Forside > Nyheder

Løgumkloster. Studiehuset.

Palasi Paneeraq Siegstad Munk på efteruddannelse i Løgumkloster i august 2013. Læs hendes rejseberetning her:

 

Galatiamiunut allakkat nassuiaasiorneqarput

Aasianni palasi Paneeraq Siegstad Munk suliffimmut atatillugu kissaateqarsimavoq, kalaallisut ajoqissanut atuartitsinermut atortussanik nutaanik peqalernissamut tapertaalaarsinnaasumik suliaqarumalluni.

 

Tamannalu piffissami 26.august – 6.september 2013 Danmarkimi Løgumklosterimi pivoq. Løgumkloster Sønderjyllandimiippoq, tassaniilluni Palasit ilinniaqqinnerminni imaluunniit pikkorissarnerminni ornissinnaasaat Teologisk Pædagogisk Center.

 

Illorsuarmi eqqissisimanarluinnartumi najugassinneqarpunga, tassaniippullu atortussakka tamarmik. Atuakkanik atorniartarferujussuaq pisariaqassappallu sulisui ikiuukkumallutik piareersimasut. Løgumkloster ukiuni akullerni mattuffiusimagaluarpoq maannali naliginnaasumik ilagiit lutherikkuusut oqaluffiattut, pikkorissariartortarfiattullu atorneqalersimasoq.

 

Biibili qupperaanni Paulusip Galatiamiunut allagai naatsunnguupput, taamaattumillu eqqarsarsimangaluarpunga eqqissiivillunga pisuttuartarsinnaallunga suliarerusaarsinnaassallugit. Kisiannili Paulusip allagaasut allatuulli allakkat imartoorujussuupput, kalaallisullu allariikkamik sanilliussinnaasannik peqanngimmat ilaanni qallunaatut oqaatsit aallaaviginiaannavinnagit allaqqaarneqaramik oqaatsit atorneqartut grækerisuut isumaat paasiniartariaqartarput. Taamaattumik oqarlanga, suliassakka angumereqqarlugit naammassisukassaavunga.

 

Galatiamiunut allakkanut nassuiaat ajoqissat atuartinneqarneranni Testementitaalerinermi Oktoberimi atorneqassapput. Pissangangilaarparalu oqaatsit atukkakka tulluartuunersut imaluunniit ullumikkut oqaatsit atukkatsinnik imaqaramik ilaasa uparuagassaqartissaneraat.

 

Qujavunga periarfissinneqarninnut, aamma neriuppunga kalaallisut atortussanik sanaartorneq Ilagiit kalaallit lutherikkuusut iluanni qullasissumik pisarialittut ineriartortinneqartuassasoq. Neriuppungattaaq palaseqatit allalluunniit teologit aamma kajumissuseqassasut atortussaliornissamut suleqataanissamut.

 

Inussiarnersumik

 

Paneeraq Siegstad Munk

Aasianni palasi

 
 
Bispekontoret - Postboks 90 - 3900 Nuuk - Tlf: 32 11 34 - Fax: 32 10 61 - biskop@ilagiit.gl